Tata Ibadah Minggu
Bahasa Batak
20 September 2026

XVI DUNG TRINITATIS

Saluhutna do Tarpatupa Ahu di Bagasan Tuhan
(Segala Perkara Dapat kutanggung di Dalam Tuhan)

MINGGU PARALEALEON
HKI-EKK HAMM

L : Marhite-hite goar ni Debata Ama, dohot goarni AnakNa Tuhan Jesus Kristus, dohot goar ni Tondi Parbadia na tumompa langit dohot tanoon, dipasaorma dameNa tu tondinta. Amen.

Rap ma hita mandok di tangiangta i 

L+J : Ale Jesus Tuhannami, bereng hami na dison, pinarmahanMi do hami saluhutna na dison, sai asi rohaM di hami, sai pangolu hami on. Amen.   

BE 111:1-2

PATIMBUL BE MA SANGAP
 
1
Patimbul be ma sangap ni Jahowa Debatanta
Dok ma mauliate i tu Debata Amanta
Ai pardangolan i sude, nang saluhut na jorbut pe
Dialo Debatanta.
 
BAHASA JERMAN

Allein Gott in der Höh sei Ehr und Dank für seine Gnade, darum, daß nun und nimmermehr uns rühren kann kein Schade. Ein Wohlgefallen Gott an uns hat, nun ist groß Fried ohn Unterlaß; all Fehd hat nun ein Ende.

2
Tongtong sombaonnami Ho, mamuji salelengna
Dibaen na digomgomi Ho, HuriaMu sudena
Na so tardodo gogoMi, sai ingkon saut do rohaMi
On pe martua hami
 

 

L : (Agenda).

Didongan Tuhan Debata ma hita saluhutna, haleluya, taendehon.

L+J :  Haleluya… Haleluya… Haleluya….

 

L : Tatangihon ma Hata ni Debata na gabe Singkat ni Patik di Minggu ta sadarion, ima na tarsurat di

Pilipi 2:1-2, songon on ma didok:

“Molo tung adong apoapo marhitehite Kristus, dohot sosososo holong ni roha dohot parsaoran ni tondi, nang talup dohot asi ni roha,gohi hamu ma halalas ni rohangkon: Sada ma parrohahon hamu; sada ma haholonganmuna; saroha, sapingkiran ma hamu!”

Ido sahatna

Rap ma hita mangido gogo laho mangulahon hataNa i.

L+J : Ale Tuhan Debata sai pargogo i ma hami laho mangulahon na hombar tu hataMi. Amen!

BE 114:1-2

 
ALE JAHOWA DEBATA
 
 
1
Ale Jahowa Debata, sai tatap hami on
Ai masiboan dosana be, do hami tu joloM
Asi rohaM di hami be, sai sesa dosa i sude
Marhite Jesus AnakMi, na mate di hau silang i
Di Golgata Di dolok Golgata
 
2
O Jesus haholongan i, sai tatap hami on.
Ho pangondingannami i, ondingi hami on
Sai unang mago hami be, ai na tinobusMi sude.
Taluhon ma sibolis i, ai na jorbut parulan ni
Pangolu be ma hami on sude.

 

L : Martangiang ma hita manopoti dosanta:

Ale Tuhan Debata, Amanami Parsariroha na sumurung. Ro do hami tu adopanMu mandok mauliate, ai Ho do silehon haluaon marhite AnakMu Tuhan Jesus Kristus naung mate tarsilang, hehe laho manobus hami jolma pardosa on. Tung na so hadodoan do asi ni rohaM. Di bagasan toruk ni roha, ro hami marsomba tu adopanMu manopoti dosa nami. Jotjot do hami manimbil sian dalanMu na tigor i. Jolma pardosa do hami di roha, pangkataion nang di angka pambahenan.

H : Ale Tuhan, sesama dosanami

L : Di adopanMi ale Tuhan, huparhatopot hami do na jotjot do ndang huradoti hami ngolu partondionnami. Humurang do hami di ulaon parsaoran, panindangion suang songoni nang di ulaon parasinirohaon. Jala jotjotan do hami pasombu diri dilalapi portibi on gabe humurang ma di uloan habadiaonMi.

Ale Tuhan, parbadia ma hami, jala togutogu ma hami asa muba hami sian angka ulaon na humurang i jala satia  mangihuthon anakMu Tuhan Jesus Kristus Tuhannami. Amen.

H : (Marende ½ suara: BE HKI 171:2)

Asi ma rohaM taringot tu pangalahongku.

Olo tutu, jotjot do na lilu dalanku.

Sesa dosangku sude Debata.

L : Tabege ma bagabaga ni Debata taringot tu hasesaan ni dosa.

“Tung sura rara dosamuna songon abit bunga dapdap, bontar do bahenonku songon itak; nang pe rara songon abit hasumba, gabe songon hapas do muse.”

Hasangapon ma di Debata na di ginjang.

S : Amen!

BE 267:3+5

 
O TUHAN SULINGKIT
 
3
Sude hupasahat tu Ho, ai Ho nampunasa hian.
Tongtong au marguru tu Ho
Ai Ho ale Jesus, sihophop sudena, nampuna au on
Ai Ho ale Jesus, sihophop sudena, nampuna au on
 
 
5
Dipuji rohangku do Ho, o Jesus, donganku tutu
Gogongku sambing nama Ho
Pinuji GoarMu, pinuji goarMu, hupuji burju
Pinuji GoarMu, pinuji goarMu, hupuji burju

 

L : Tajaha secara Responsoria nagabe turpuk ni Epistel di mingguta sadarion, ima na tarsurat di

Jona 4:1-11.

Songon on ma didok disi:

 

1

Alai sogo situtu do roha ni si Jona disi, jala piripirion ibana.

2

Jadi martangiang ma ibana tu Jahowa jala didok ma: Oe, ale Jahowa, nda i do hatangku hian, uju di tanongku dope ahu? Umbahen hujoloani nian maporus tu Tarsis, ai huboto hian do, Debata parasi roha jala pardengganbasa do ho lambat tarrimas, jala parasi roha godang, jala na olo sumolsol rohana taringot tu hamagoan.

3

On pe ale Jahowa, ua buat ma tagonan hosangku sian ahu, ai dengganan ahu mate sian na mangolu.

4

Dung i ninna Jahowa ma: Tung turut ma ho marronirimas?

5

Dung i ruar ma si Jona sian huta i, jala hundul tungkan habinsaran ni huta i, jala dibahen disi soposopona, jala hundul tusi marlinggomlinggom, paima diida manang aha masa tu huta i.

6

Jadi dipadiri Debata Jahowa ma hau dulang sada, na simbur magodang di atas ni si Jona bahen parlinggoman di atas uluna, paluahon ibana sian hinamagona, jadi las situtu ma roha ni si Jona ala ni hau dulang i.

7

Dung i dipadiri Debata ma sada gulokgulok di hananaek ni sibalik hunik manogotna i, gabe diruangi ma hau dulang i, laos malos.

8

Jadi dung binsar mata ni ari dipadiri Debata ma alogo na mohop sian purba. Jadi didoit mata ni ari ma ulu ni si Jona, pola mandate ibana, jadi dipangido ma mate hosana, jala didok do: Dengganan ahu mate sian na mangolu!

9

Dung i didok Debata ma tu si Jona: Tung turut ma ho marronirimas ala ni hau dulang i? Gabe didok ibana ma: Turut do ahu marronirimas sahat ro di hamatean.

10

Jadi didok Jahowa ma: Gari ho marsak do roham ala ni hau dulang na so hinangaluthonmi manang pinagodanggodangmi, na tubu saborngin, jala mago saborngin.

11

Baliksa pala ahu, tung so marasi ni roha ahu mida Ninive, huta na bolon i, na marisi lobi saratus duapulu ribu jolma, angka na so umboto parsirangan ni siamunna dohot sihambirangna, tole pinahan na sai deak?

L : I do sahatna, martangiang ma hita:

Martua ma halak na umbege dohot na umpeop hata ni Debata.

L+J: Amen

BukaBibel

BE 174:1-2 

TOROP DOPE
 
1
Torop do pe na siat i, di hasampuran rea
I pe hamu pardosa i, sai olo ma porsea
Ai Debata manjou hamu, tu hasonangan situtu
Hamu, hamu dijou Debatamu.
 
2
Tama longang roham ale, umbege pangontangNa
Antong sai unang jua be, tangihon pamioNa
Ai Debata mamio ho, dibahen i sai ro ma ho
Sai ro, sai ro, tu surgo ma ho ro.
 
L : Rap ma hita manghatindangkon Hata Haporseaonta i
 
HATA HAPORSEAON
 

Ahu porsea di Debata Jahowa,
I do Ama pargogo na so hatudosan, na tumompa langit dohot tano.

Ahu porsea di Jesus Kristus,

Anak ni Debata Jahowa nasasada i;
i ma na tinubuhon ni si Maria, na gabegabean sian Tondi Parbadia
andorang so habubuhan.

I do Tuhanta na tumaon na bernit di panguhuman ni si Latus,
na mate tarpajal do Ibana di hau pinarsilang,
na tuat tu banuatoru dung ditanom, na mulak mangolu di ari patoluhon,
na manaek tu Surgo laho hundul tu siamun ni Debata Jahowa,
AmaNa i pargogo na so hatudosan i,
disi ma Ibana paima mulak sogot tu tano on
manguhumi halak na mangolu dohot na mate.

Ahu porsea di Tondi Parbadia, jala adong sada Huria na badia,
Huria hatopan ni halak Kristen angka na badia,
dohot di hasesaan ni dosa dohot di Hata i na mandok:
Mulak mangolu sogot daging ni halak naung mate,
dohot di hangoluan na so ra suda. Amen

BE 707:1…

 
HAGOGOON DOHOT APUL-APUL
 
1
Hagogoon dohot apul-apul
Do dilehon Tuhan i tu au,
Ganup ari au ditogu-togu
Ganup tingki diondingi au.
Ai hombar tu lomo ni rohaNa
Do dilehon Tuhan i tu au
Ro marsorin arsak las ni roha
Haporseaonhu dipatau.
 
2
Ganup tingki Tuhan raphon ahu
Jala sai dipasu-pasu au.
Sai di togu au molo madabu,
Talu musu jala monang au.
Ai pargogo na sohatudosan,
Debatangku salelengna i
Mangalehon dame dohot tua,
Tu angka na bojok roha i.
 
 
3
Songon Ama do tu anakkonNa
Holong ni Tuhanta i tu au.
Ndang mansadi pangurupionNa
Hombar tu padanNa na tu au.
Debata Amanta na di ginjang
I do haposanku sai tongtong.
Di pangiringiring ni tanganNa,
Dame, sonang do rohangkinon.
 
 

Pilippi 4:10-19

 

10

Alai tarhilas situtu do rohangku di bagasan Tuhan i, ala mangulahi tarida rohamuna sumarihon na ringkot di ahu. Tongtong do i nian rohamuna, alai holan tingkina do na so une.

11

Ndada ala na hurangan ahu, umbahen na hudok i; ai nunga huguruhon, mangkasonangkon na adong.

12

Huboto do marpangontik, huboto do marlobilobian; tongtong do somal ahu di saluhutna, nang bosur, nang rapar, nang marlobilobi, nang marnahurang.

13

Saluhutna do tarpatupa ahu marhitehite Ibana, na margogoihon ahu!

14

Alai tahe, denggan do pambahenmuna i; ai ditiroi hamu do haporsuhonku.

15

Alai diboto hamu halak Pilippi do, na so adong, dungkon ni hamu, huria na hubahen donganku mangetong hepeng na ro dohot na laho, olat ni mula ni pamaritahonki, di na borhat i ahu sian Makedonia.

16

Ai di Tessalonik dope ahu, nunga ditongos hamu na ringkot di ahu, sahali ro di dua hali.

17

Ndada silehonlehon i hulului parbue i do na hujalahi; na gabe singirmuna do i.

18

Alai sandok tuk do di ahu, marlobilobi gari adong; suksuk do di ahu, dung hujalo na tinongosmuna marhite sian si Epaproditus: Uap na hushus ma i, pelean halaean, halomoan ni roha ni Debata.

19

Alai gohan ni Debatangku do nasa na ringkot di hamu, hombar tu hamoraonna i di hasangapon i, di bagasan Kristus Jesus!

 

Buka Bibel
 
 
 
Ende Andorang So Jamita

Hangoluan do hataM, sibegeon nami.

Ala asi ni rohaM, O Debata nami.

HataMi naung rade bahen bohal nami.

Sai patorang ma sude, gabe ngolu nami.

Ende Dung Sidung  Jamita

Pasu-pasu  hataMi, sai suan tu rohangki.

Asa marparbue i, ale Jesus Tuhanki.

Sai martua jolma i, na umpeop  hataMi.

Tangiangku nama i, sahat ma tu tanganMi.

 

BE 501:1-2

SAI DITOGUTOGU JESUS
 
1
Sai ditogutogu Jesus tondingki na gale i,
Asa unang be au ganggu dipanoguonNa i,
maradian do rohangku, Molo huhaposi i,
Nang sitaonon dipasonggop sai jonok do Tuhanki.
Nang sitaonon dipasonggop, sai jonok do Tuhanki.
 
BAHASA JERMAN

Jesus führt mich allerwegen, gibt mir Kraft in jeder Not, stützt mich treu im dunklen Tale, speist mich mit dem Lebensbrot. Wenn die müden Schritte straucheln, wenn verschmachten will die Seel, sprudelt auch aus hartem Felsen auf sein Wort ein kühler Quell.

 
2
Sai diiringiring Jesus, au na gale situtu.
Ditungkoli do langkangku, diparmudu au burju.
Molo loja au mardalan, nang maheu tondingki
LehononNa aek na tio sian batu mamak i
LehononNa aek na tio sian batu mamak i
 
 

BE 758:1…

 
JAHOWA PANGURUPI
 
1
Jahowa pangurupi di si ulaonmi.
Dilehon pos ni roha di ganup tingki i,
Nang pe sipata ganggu haporseaonmi
Jamot tongtong Tuhanmu manjaga ngolumi.
 
2
Jahowa las ni roha saleleng ngolumi,
Ibana haroroan ni nasa na uli
Ai disarihon Jesus sude naringkot i,
Halashon panoguon ni Jesus Tuhanmi.
 
 
3
Jahowa pandongani di na porsea i
Ibana patuduhon nang sidalananmi
Asa marolop-olop ho di ujungna i,
Ibana do donganmu nuaeng nang sogot i.
 
 

U : Nunga marsaringar hata ni Tuhan i di Minggu XVI dung Trinitatis dohot paralealeon HKI-EKK Hamm, marhite ojahan “Saluhutna do tarpatupa ahu marhitehite Ibana na margogoihon ahu”. Sian pardalanan ni ngoluna ni Apostel paulus di sude na masa binolusna, diboto do marpangontik diboto do marlobilobian, tongtong do somal ibana disaluhutna, nang bosur, nang rapar, nang marlobilobi, nang marnahurang, nunga diguruhon manghasonanghon na adong, ai Kristus do silehon gogo tu ibana. Nang ganup na masa di ngolunta, Tuhan i do silehon gogo tu hita. Ndang ditadinghon Tuhan i angka na porsea. Tahaporseai jala tahangoluhon ma hata ni Tuhan i, ai Ibana do margogoihon hita diganup tingki. 

Taendehon “Tuhanku do Pature Dalanhi”

S : (Marende BE 772:1)

Tuhanhu do pature dalanhi

Tuhanhu do patiur langkangki

Sian nasa rohangki hupasahat ngolungki

Tuhanhu do patiur langkangki.

U : Tangiang …

TANGIANG ALE AMANAMI

Ale Amanami na di banuaginjang.
Sai pinarbadia ma goarMu
Sai ro ma harajaonMu
Sai saut ma lomo ni rohaM
Di banuatonga on, songon na di banuaginjang.

Lehon ma tu hami sadarion hangoluan siapari.
Sesa ma dosanami
Songon panesanami, di dosa ni dongan na mardosa tu hami

Unang hami togihon tu pangunjunan
Palua ma hami sian pangago

Ai Ho do nampuna harajaon,
dohot hagogoon ro di hasangapon
saleleng ni lelengna.
Amen.

SELAMAT HARI MINGGU
TUHAN MEMBERKATI