Tata Ibadah Minggu
Bahasa Batak
6 September 2026

XIV DUNG TRINITATIS

Manghaholongi Debata dohot Jolma
(Kasih kepada Allah dan Sesama Manusia)

L : Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia. Dipasaorma dameNa tu tondita be! Amen

Rap ma hita mangido di tangiangta i 

L+J : Ale Jesus Tuhannami, bereng hami na dison, pinarmahanMi do hami saluhutna na dison, sai asi rohaM di hami, sai pangolu hami on. Amen.   

L : Ganup na holong roha di Ahu, radotan ni i do hatangki, jala haholongan ni Damang ma ibana, gabe ro ma Hami manopot ibana, maringanan tubagasan ibana. 

J : Jahowa do pangondingan ni sude angka na mangkaholongi Ibana, jala disiaphon do sude angka parjahat. 

L : Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana? 

L+J : Mangendehon BE 195:1+4

HOLONG DO ROHA
 
1
Holong do roha, ni Debatangku, holong rohaNa tongtong di au
Ai dipatupa do, haluaonku, marhite Jesus AnakNa i.
 
4
Na ro do Jesus pardameanku, parmahan bolon na burju i
Dibahen i hudok: Holong do roha Ni Debatangku Tongtong di au
 
 

BE 15

AUT NA SARIBU HALI GANDA
 
1
Aut na saribu hali ganda saringar ni soarangki
Naeng nasa gogo bahenonku mamuji Debatantai
Paboa las ni rohangki hinorhon ni pambaenna i
 
4
Mauliate ma rohangku di Ho o Debata tongtong
dibaen sude denggan basamu naung nilehonmu di au on
ai dipatongon Ho tongtong sude na ringkot di au on

 

L : (Agenda)

Didongan Tuhan Debata ma hita on saluhutna, Amen. haleluya,haleluya, haleluya, taendehon.

L+J : (Mangendehon: Haleluya… Haleluya… Haleluya….)

 

L : (Manjaha Patik V – X)

I do sahatna. Rap ma hita mangido di PatikNa i.

L+J : Ale Tuhan Debata sai pargogo i ma hami mangulahon na hombar tu PatikMi. Amen!

BE 722

TU JOLOMI TUHANKU
 
1
Tu joloMi Tuhanku, huboan diringkon
Palua ma tondingku, sian saluhut dosangkon
Jesus Ho do Tuhanku, Jesus Ho do Rajangku,
Tu tanganMu ma O Tuhan hupasahat daging tondingkon.
 
2
Tu jolo ni Tuhanku marsinggang au hohom,
Tangihon tangiangku, asi ma rohaM di au on,
Jesus do na umboto saluhut na rumingkot.
DameMi na manongtong, lehon ma tu au on naposoM.
 
 

 

L : Martangiang ma hita manopoti dosanta tu adopan ni Debata!

Ale Jahowa, Debatanami jala Ama nami! Ho do pargogo na so hatudosan na manompa langit, tano dohot nasa isina. Na badia do Ho jala parasiroha na manongtong ro di salelenglelengna.

J : Ndang tama nian hami ro jala jongjong di adopanMu, ala ni godang ni dosanami. Jotjot do husungguli hami rimasMu, jala ndang huula hami lomo ni rohaM, atik pe naung dilehon jala dihatahon Ho Barita na Uli tu hami, asa marhitehite i botoon nami, holan Ho do Tuhan jala Debata, na manompa hami jala na patupahon haluaon nami.

L : Tongtong do sai mian di bagasan ngolu nami, angka ulaon na mambahen ganggu jala gale haporseaon nami, marhitehite angka ulaon na so hinalomohonMu; i ma pos ni roha di angka nasa na adong diportibion, unjotjotan do hami porsea di saluhutnai martimbangkon porsea tu HasangaponMu, marhitei asima roham dihami ale Tuhan Debata nami.  

J : Asi ma rohaM, sai marpamuati rohaM di hami. Sai sesa ma saluhut dosa nami, ala ni mudar ni AnakMu Tuhan Jesus Kristus Tuhan nami. Amen.

(Mangendehon: BE 182:2)

“Tu joloM O Debatangku”

Husolsoli do rohangku na gok dosa i tongtong;

Ai godang ariaringku na hubahen ambolong.

L : Tangihon hamu ma Hata ni Debata taringot tu hasesaan ni dosanta:

Jahowa, Jahowa do Debata na talup jala na asi roha, lambat tarrimas, jala godang denggan basana dohot habonaronna. Na pahothon denggan basana i pola marriburibu sundut jala marpamuati rohana mida hajahaton, pangalaosion dohot dosa.

Hasangapon ma di Debata na di ginjang.

L+J : Amen!

BE 699

 
SINGKOP DO ASI NI ROHAM
 
2
Di na hutanda dosangki, gok biar rohangki,
Alai ala ni asiMi, mardame rohangki.
 
4
Hutiop bagabagaMi, di pardalananki,
Ho Tuhan lombulombungki, di paraloan i.

 

L : Tajaha secara Responsoria nagabe turpuk ni Epistel di mingguta sadarion, ima na tarsurat di

5 Musa 11:13-21

Songon on ma didok disi:

 
 
13

Molo tung tinggil rohamuna manangihon tonangku, angka na hutonahon i tu hamu sadarion, mangkaholongi Jahowa, Debatamuna i, dohot mangoloi Ibana sian nasa rohamuna dohot sian nasa ateatemuna.

14

Ahu ma mangalehon udan tu tanomuna di tingki halehetanna, udan di bulan sipaha pitu dohot udan di bulan sipaha sada, asa tarpapungu ho emem dohot anggurmu dohot miakmu.

15

Ahu huhut patubuhon di duhutduhut di ladangmu, hangoluan ni pinahanmu, asa mangan ho jala bosuran.

16

Dibahen i ramoti hamu ma dirimuna, asa unang tarela rohamuna laos marbalik hamu, jala dioloi hamu angka debata sileban, huhut marsomba tusi.

17

Jadi marpiarpiar rimas ni Jahowa maon mida hamu, gabe Ibana mangkinsu langit i maniopi udan, tano i pe ndang lehononna gogona, gabe tibu hamu mago sian tano na denggan i, na nilehon ni Jahowa tu hamu.

18

Antong sai parateatehon hamu ma angka hatangkon jala pamasuk hamu tu rohamuna jala rahuthon hamu angka i bahen partinandaan di atas tanganmuna, jala bahen parningotan di holangholang ni matamuna.

19

Jala ajarhon hamu angka i tu angka anakmuna, taringoti hamu angka i, molo hundulhundul ho di bagasan jabum manang mardalani ho di pardalanan, manang laho modom pe ho, nang dung hehe muse.

20

Jala ingkon surathononmu angka i tu tohang ni jabum dohot tu panggumbanganmu.

21

Asa leleng hamu mangolu nang pinomparmuna i di tano naung niuarihon ni Jahowa tu angka ompumuna i, lehononna tu nasida, songon leleng ni angka ari ni langit lelengmuna tahe di atas tano on.

L : I do sahatna, martangiang ma hita:

Martua ma halak na umbege dohot na umpeop hata ni Debata.

L+J: Amen

Buka Bibel

BE 695

 
JESUS TUHANKU DI HO MA AU ON
 
1
Jesus Tuhanku di Ho ma au on,
Asa mangihut tu Ho au tongtong
Gohi rohangku ingani au on.
Sonang di Ho tongtong,
O Tuhan togu ma au.
O Tuhan togu togu ma au,
Gohi rohangku ingani au on,
Sonang di Ho tongtong.
 
4
Na marhaposan tu Jesus tahe, sai na martua ibana muse,
Sonang ibana di portibion, nang di surgo inon,
Jolma na bonar burju, Jolma na bonar huhut burju,
Sonang ibana di portibion, nang di surgo inon.
 
 
L : Rap ma hita manghatindangkon Hata Haporseaonta i
 
HATA HAPORSEAON
 

Ahu porsea di Debata Jahowa,
I do Ama pargogo na so hatudosan, na tumompa langit dohot tano.

Ahu porsea di Jesus Kristus,

Anak ni Debata Jahowa nasasada i;
i ma na tinubuhon ni si Maria, na gabegabean sian Tondi Parbadia
andorang so habubuhan.

I do Tuhanta na tumaon na bernit di panguhuman ni si Latus,
na mate tarpajal do Ibana di hau pinarsilang,
na tuat tu banuatoru dung ditanom, na mulak mangolu di ari patoluhon,
na manaek tu Surgo laho hundul tu siamun ni Debata Jahowa,
AmaNa i pargogo na so hatudosan i,
disi ma Ibana paima mulak sogot tu tano on
manguhumi halak na mangolu dohot na mate.

Ahu porsea di Tondi Parbadia, jala adong sada Huria na badia,
Huria hatopan ni halak Kristen angka na badia,
dohot di hasesaan ni dosa dohot di Hata i na mandok:
Mulak mangolu sogot daging ni halak naung mate,
dohot di hangoluan na so ra suda. Amen

BE 202:1 …

(Pelean 1 & 2)
 
HUHAHOLONGI HO
 
1
Huhaholongi ho gogongku, huhaholongi ho tongtong
Marhitehite pambaenanku, nang sian nasa rohangkon
Ai Ho do sumondangi au ro di na mate au
 
2
Huhaholongi ho ngolungku, ai Ho do alealengki
Sai naeng tongtong Ho pujionku, saleleng au sinondangMi
Holong mamolin rohangki, di Ho o Jesuski.
 
 
3
Tung so jumolo Ho hutanda, ro di na hinauliMi
Tung so jumolo Ho huida, Ho arta na sumurung i
Na marsak au huhut tungki, dibahen otongki
 
4
Na lilu au huhut mapitung, umbaen na so hutanda Ho
Na sorat au dibaen huusung, sude pardosaonku do
Alai nuaeng mananda do, rohangkinon di Ho

Lukas 10:25-37

 
 
25

Dung i hehe ma sada sibotopatik mangunjuni Ibana, ninna ma: Guru, dia do sibahenonku, asa hutean muse hangoluan na salelenglelengna?

26

Gabe ninna Jesus ma mandok ibana: Aha do tarsurat di patik i? Beha do dijaha ho?

27

Jadi dialusi ma songon on: Ingkon dihaholongi ho do Tuhan Debatami sian nasa ateatem, sian nasa tondim, sian nasa gogom dohot sian nasa roham, jala donganmi songon dirim!

28

Dung i ninna ma mandok ibana: Tingkos do alusmi; ulahon ma i, gabe mangolu ma ho!

29

Alai naeng ma pintoranna dirina gabe ninna ma mandok Jesus: Ai ise do donganku goaron?

30

Jadi mangalusi ma Jesus, ninna ma: Adong ma sada halak, na tuat sian huta Jerusalem laho tu huta Jeriko, gabe disamun panamun; dipupusi ibana, dipukpuhi, dung i laho; matemate ne do ibana ditadingkon.

31

Tongon ma mamolus malim sada sian dalan i; diida do ibana, alai dilaosi.

32

Songon i do sahat sahalak Lepi tu inganan i; diida do ibana, alai dlaosi.

33

Alai mamolus ma sian i sahalak Samaria; jala asi do rohana marnidasa.

34

Didapothon ma, dipauli ma bugangna, didaishon ma miak dohot anggur tusi; dipahundul ma ibana tu hodana, diboan ma ibana tu parbornginan, laos dipasarisari ma ibana.

35

Torang ni arina i dirungkari ma rupia dua, dilehon ma i tu nampuna bagas i, ninna ma: Pauliuli ma ibana; jala molo tung lobi harugianmu, husingkat pe, laho mulak sian on.

36

Ise sian na tolu i di roham, gabe dongan ni na tardobo i?

37

Jadi didok ma: Na marasi ni roha di ibana. Gabe ninna Jesus ma mandok ibana: Laho ma ho, bahen ma songon i!

Buka Bibel
 
 
 
Ende Andorang So Jamita

Hangoluan do hataM, sibegeon nami.

Ala asi ni rohaM, O Debata nami.

HataMi naung rade bahen bohal nami.

Sai patorang ma sude, gabe ngolu nami.

Ende Dung Sidung  Jamita

Pasu-pasu  hataMi, sai suan tu rohangki.

Asa marparbue i, ale Jesus Tuhanki.

Sai martua jolma i, na umpeop  hataMi.

Tangiangku nama i, sahat ma tu tanganMi.

 

BE 481

 
GODANG DOPE
 
1
Godang dope siguruhononmi, asa tudos ho dohot Tuhanmi
Sai tong na hurang hatigoranmi. So tuk do pe haporseaonmi.
Dirim sambing, dihaholongi ho. Donganmu laos dihalupahon ho.
 
 
3
Tatiru holong ni rohaNa i, pinatuduhon ni Tuhanta i,
Tahaholongi ma donganta i, ai ruas ni Tuhanta do nang i!
Mardame ma, marsijalangan ma; Tatuju ma solhot tu Debata!

BE 706

 
GODANG NI PASU-PASU I
 
1
Godang ni pasu-pasu i, dilehon Tuhanki,
Tarlobi asi-asiMi, marhite anakMi.
 
Jalo ma pujianki, Jesus Sipalua i,
Boi au bongot tu surgo i,
Marnida hasangaponMi.
 
2
Tondong nang ale-ale i, palashon rohangki,
Alai na umuli i, boi au anakMi
 
Jalo ma pujianki, Jesus Sipalua i,
Boi au bongot tu surgo i,
Marnida hasangaponMi.
 
3
Ndang dung mansohot basaMi, saleleng ngolungki,
Ho ma tongtong pujionki, sangap digoarMi
 
Jalo ma pujianki, Jesus Sipalua i,
Boi au bongot tu surgo i,
Marnida hasangaponMi.
 

TANGIANG ALE AMANAMI

Ale Amanami na di banuaginjang.
Sai pinarbadia ma goarMu
Sai ro ma harajaonMu
Sai saut ma lomo ni rohaM
Di banuatonga on, songon na di banuaginjang.

Lehon ma tu hami sadarion hangoluan siapari.
Sesa ma dosanami
Songon panesanami, di dosa ni dongan na mardosa tu hami

Unang hami togihon tu pangunjunan
Palua ma hami sian pangago

Ai Ho do nampuna harajaon,
dohot hagogoon ro di hasangapon
saleleng ni lelengna.
Amen.

HALELUYA